22 වන ආණ්ඩුක්රම ව්යවස්ථා සංශෝධන පනත් කෙටුම්පත අභියෝගයට ලක් කරමින් ගොනුකර ඇති පෙත්සම් විභාගයෙන් අග්ර විනිශ්චයකාර ප්රීති පද්මන් සුරසේන ඉවත් විය යුතු බවට ශ්රී ලංකා නීතිඥ සංගමය (BASL) ශ්රේෂ්ඨාධිකරණය හමුවේ මෝසමක් ගොනු කරමින් පවසා සිටියි.
අදාළ සංශෝධනය නීතියක් බවට පත් වුවහොත් එහි ප්රථම නීතිමය වාසිය හිමිවන්නේ අග්ර විනිශ්චයකාරවරයාටම බැවින්, ඔහු එම පෙත්සම් විභාගයෙන් ඉවත් වීම නීතිමය හා වෘත්තීය මූලධර්මවලට අනුකූල වන බව නීතිඥ සංගමය පෙන්වා දෙයි.
අග්ර විනිශ්චයකාර ප්රීති පද්මන් සුරසේන ට එරෙහිව දූෂණ, නෑනාදෑකම් සහ ව්යාපාරිකයන්ගෙන් අල්ලස් ලබාගෙන තීන්දු ලබා දුන්නේ යැයි කියන බරපතල චෝදනා රැසක් එල්ල වී ඇති බව අදාළ නිවේදනය මගින් අනාවරණය කෙරේ. මෙරට අධිකරණ ඉතිහාසය තුළ අග්ර විනිශ්චයකාරවරයෙකුට එරෙහිව මෙවැනි බරපතල අල්ලස් හා දූෂණ චෝදනා එල්ල වූ පළමු අවස්ථාව මෙය වන අතර, එමගින් මෙතෙක් අධිකරණ පද්ධතිය කෙරෙහි පැවැති ජනතාවගේ විශ්වාසයට දැඩි බලපෑමක් එල්ල වී තිබේ.
දූෂණයට එරෙහි මහජන රැල්ලක් මත බලයට පත් වූ ජනාධිපති අනුර කුමාර දිසානායක, චෝදනාවලට ලක්ව සිටින අග්ර විනිශ්චයකාරවරයා සුරැකීම සඳහා සෘජුවම මැදිහත් වන බවටද මෙහිදී දැඩි ලෙස විවේචනය කෙරේ. දූෂිතයන්ට දඬුවම් කරන බවට ලබා දුන් ජනවරම අමතක කරමින්, චෝදනා ලැබූ පුද්ගලයෙකුගේ ධුර කාලය දීර්ඝ කිරීමට කටයුතු කිරීම දැඩි උපහාසාත්මක තත්වයක් බව පෙන්වා දෙනු ලබයි.
ගොඩගැසී ඇති ලක්ෂ 11කට අධික නඩු ප්රමාණය කඩිනමින් අවසන් කිරීම සඳහා 22 වන සංශෝධනය ගෙන එන බවට රජය ප්රකාශ කළද, එය අසත්ය ප්රකාශයක් බව නීතිඥ ප්රජාව පවසති. මෙම සංශෝධනයේ සැබෑ අරමුණ වත්මන් අග්ර විනිශ්චයකාරවරයාගේ ධුර කාලය දීර්ඝ කරමින් පාලක පක්ෂයට වාසිදායක තීන්දු ලබා ගැනීම සහ ඊළඟ ජ්යෙෂ්ඨතම විනිසුරුවරයා වන යසන්ත කෝදාගොඩ අග්ර විනිශ්චයකාර ධුරයට පත්වීම වැළැක්වීම බවටද චෝදනා එල්ල වේ.
විධායකයේ අවශ්යතාවලට යටත් වන අධිකරණ පද්ධතියක් පවතින රටක ආයතනික ගෞරවය බිඳ වැටෙන අතර, ව්යාපාරික පරිසරය හා ජාත්යන්තර විශ්වාසනීයත්වය සම්පූර්ණයෙන්ම නැති වී යන බව අදාළ නිවේදනය වැඩිදුරටත් අවධාරණය කරයි. එබැවින් අධිකරණයේ ස්වාධීනත්වය සහ රටේ ප්රජාතන්ත්රවාදී අනාගතය සුරක්ෂිත කර ගැනීම සඳහා වහාම සුදුසු පියවර ගත යුතු බව පෙන්වා දී ඇත.
මීළඟ ලිපිය – අල්ලසට නිවසක් දුන්නේ කව්ද?
